بعد ما شفت اعلانات اللجنة التأسيسية اللي بتقول لنا نقرا و نمسك قلم و نشطب و نغير فرحت و عقدت العزم اني لازم
اشارك و اكون ايجابي و افحص و اتمحص عشان اقول رايي بصراحة
في نهاية الموضوع وجدت نفسي زي اللي جاله عريس لبنته و الراجل مستوفي جزء كبير من الشروط لكن قلبي مش مستريحله. البنت والا هي بايرة والا انا محتاج اجوزها جوازة مش راضي عنها. قراري ده اللي حيدفع ثمنه في الآخر هي بنتي و احفادي عشان كدة لو مش متأكد دشليون في المية حقول لا
نبتدي بقي في ليه قلبي مش مرتاح قوي
١. الدستور في مجمله بيرسخ لفكر طبقي مقيت! حاجة مقرفة جدا اننا نشترط رعاية او خدمات نقدمها فقط لغير القادرين، يعني حنصنف المجتمع لقادر و غير قادر؟ طب مين اللي حيحدد القادر و الغير القادر؟ طب و علي اي اساس؟ مفيش حد فكر في الجانب النفسي للمواطن؟ يعني تفتكروا الواحد فينا يبقي منظره ايه و هو باعت شهادة فقر مع ابنه او بنته للمدرسة او المستشفي؟ طب و ايه رأيكم في عزيز قوم ذل؟ ممكن يكون شخص له مكانة مجتمعية رفيعة لكن موارده المادية ضعيفة... اطلب منه شهادة فقر برده؟ الدستور اللي مايفكرش في كرامة و عزة المواطن زي العريس اللي حيذل و يعاير بنتي في كل مناسبة. بصراحة حتي لو غني جدا او عنده منصب مرموق حرفضه.. كرامة و عزة بنتي عندي بالدنيا
٢. مسودة الدستور دي عاملة زي العريس اللي كل حاجة عنده حسب التساهيل. حتسكن البنت فين؟ اكيد يا عمي حتسكن سكن مناسب بس ربنا يسهل.. طب و المهر؟ طبعا حدفع مهر كويس .. ربنا يسهل.. يعني في مسودة الدستور لينا الحق في العيشة الكريمة و الصحة و الوظيفة لكن زي العريس كدة كله حسب التساهيل. مفيش حاجة محددة. دي حتي الحتي اليتيمة بتاعة الأجور و المرتبات الدستور عايز يربطها بالانتاج مش بمتطلبات المعيشة او الأسعار
٣. غريبة برده ان العريس كل حاجة عايز يحددلها مدة. اكنه بيقولي حيعامل العروسة في الاول بطريقة و بعد كدة طريقة تانية. يعني مثلا النسبة بتاعة العمال و الفلاحين كانت الأول ٥٠٪ و مع اختلافنا او موافقتنا علي المادة دي ايه لازمة انها
تتحط للدورة االي جاية بس و بعد كدة تتلغي؟ والا العريس فاكرنا حنقبل علي امل يحلها حلال لما الانتخابات الجاية تيجي. والا الحتة دي متسابة عشان كل مرة نتفاوض عليها؟ العمال و الفلاحين كويسيين و قطاقيط نمد دورة كمان.. ابتدوا يتعوجوا و مش سامعين الكلام نلغي النسبة! مش عاجبني العريس اللي عايز يحط البنت تحت ضرسه قوي كدة
٤. التلات حاجات اللي فوق واضحة و حسستني ان العريس مش هو اللي انا ممكن اوافق عليه، لكن فيه حاجات تانية ريحتها مش ولا بد، يعني العريس جاي عايز نقرا فاتحة و كتب كتاب و دخلة كله في ١٥ يوم. مش عارف متسربع ليه؟ ، بعدين حاطط شروط غريبة جدا، يعني مثلا مدي نفسه حق انه يبيع حتة الارض بتاعة البنت و مدخل ناس كتير قوي في العلاقة بينهم
في النهاية لو جالك عريس لبنتك و لقيت فيه اي حاجة من دول، حاجة واحدة بس كفاية تخليك تقول لا!!! علينا من ده بايه؟ البنت بنت اصول و مش بايرة عشان تاخد عريس بكل الذل ده. فما بالك لو عريس ده متقدم لبناتنا كلنا حتة واحدة
بصراحة انا رافض العريس. بنتي تستاهل احسن من كدة. تستاهل عريس يحطها جوة عنيه و يحفظها و يصون كرامتها جوة البيت و برة البيت.... مش زوج كل ما يشوفها يقولها تبوسي ايدك وش و ظهر اني باكلك و اشربك
انا مش حسكت السكوت الي هو علامة الرضا و حقولها باعلي صوت اني رافض العريس ...... لا لدستور الذل و المهانة
تعليقات